पुणे : नवोदित व हौशी कलाकारांनी काढलेली विविध प्रकारची कल्पनाचित्रे, निसर्गचित्र, व्यक्तिरेखा आणि त्यातील विविध भाव व नैसर्गिकरित्या तयार झालेल्या विविधांगी छटा पुणेकरांनी कलानुभूती चित्रकला प्रदर्शन व स्पर्धेत अनुभवल्या.
नवोदित कलाकारांना हक्काचे व्यासपीठ मिळावे, तसेच होतकरू आणि छंद म्हणून चित्रकला जोपासणाऱ्या कलाकारांना आपली कला सादर करायला संधी मिळावी यासाठी इव्हेंट हाउस एंटरटेनमेंटतर्फे ‘कलानुभूती’ चित्रकला प्रदर्शन व स्पर्धेचे आयोजन करण्यात आले आहे. हे प्रदर्शन बालगंधर्व कलादालन येथे २७ व २८ एप्रिल २०१९ रोजी सकाळी आठ ते रात्री आठ या वेळेत सुरू राहणार आहे. आजच्या सत्रात चित्रपट दिग्दर्शक नितीन विजय सुपेकर यांच्यासह अनेक मान्यवरांनी या प्रदर्शनास हजेरी लावली.
१००हून अधिक नवोदित कलाकारांनी काढलेले व्यक्तिचित्र, निसर्गचित्र, अॅबस्ट्रॅक्ट, स्टील लाइफ अशा वेगवेगळ्या श्रेणींमधील तब्बल २०० चित्र या प्रदर्शनामध्ये असणार आहेत. याचबरोबर ‘अब नॉर्मल होम’ संस्थेतील विशेष मुलांनी काढलेली चित्रेदेखील या प्रदर्शनात पहायला मिळणार आहेत.
‘कलानुभूती’साठी पुणे आणि महाराष्ट्रातूनच नव्हे, तर कर्नाटक, आंध्रप्रदेश, तामिळनाडू, बंगाल, दिल्ली आणि इतर राज्यांतून कलाकारांनी साधारण ६०० चित्र संस्थेकडे पाठविण्यात आली होती. त्यातील निवडक २०० चित्रे प्रदर्शित करण्यात आली आहेत.